PAGE - 1
TUALCHHUNG :
Damlo: Pu Lalmuanawma H/o Lalvenpuii Lalsavunga Sec. a mi chu Falkawn Referal Hospitalah a pile zai a ni a, tunah inlamah enkawl chunzawm turin a lo chhuak leh ta.@@ Pu Mickey Zoremruatpuia H/o Lalramzauvi Damvea Sec. a mi chu chuap lam \halo avangin Oct. ni 21, 2015(Nilaini) khan Durtlang Hospitalah Admit a ni.
@@ Pu B. Lalbiakmawia H/o Lalruatkimi Kapdaia Sec. a mi chu Nerve \halo avangin Guwahati ah refer niin Oct. 21, 2015 khan Guwahati lam an pan.
@@ Pi Mimi Zonunpuii W/o Lalnunkima Buala Sec. a mi chu hun engemaw chen a\ang khan taksa lam \hat lohna avangin inlamah enkawl a ni.
@@ Pu Sangthanga H/o Ngai\huami Kapdaia Sec. a mi chu chuap lam \halo avangin Oct. ni 21, 2015 (Nilaini) khan Civil Hospital-ah admit a ni.
@@ Pu Lalzoliana W/o Lalhnehpuii Saichhuma Sec. a mi chu Mitliam natna avangin Oct. ni 23, 2015 khan Aizawl Hospital ah admit niin ICU ah enkawl mek a ni.
Nau nei: Pu Lalbiakmawia (Mamawia) leh Pi Lalrammawii te nupa Kapdaia Sec. a mi te chuan an fa pahnihna atan UPHC, Hlimen ah Oct. 21, 2015 ni khan fapa duhawm tak an nei thar.
Tuak thar: Lalhriatpuia S/o Lalthlengliana Kapdaia Sec. leh Lalpekhlui D/o Malsawmdawngliana Bukpui khua te chu Oct. ni 21, 2015(nilaini) khan dam chhunga nupa ni turin ‘tiam tlat e’ an ti.
Kelkang kal haw: Oct. ni 22, 2015 khan Kelkang harhna chhim a kal Hlimen Presyterian kohhran nuho leh Damveng Kohhran member engemaw zat te chuan tluang takin Hlimen an lo thleng leh ta a. Kelkang kal te hi Bialtu Pastor C.Sapkaia’n a ho niin kan thudawnna chuan a a sawi.
Camping nei: Hlimen Presbyterian Kohhran Pavalai Pawl buatsaihin Pu Remthangkhuma te in Kapdaia Sec. ah Oct. ni 20-24, 2015 chhung khan Gospel Camping buatsaih a ni a, Camper te hi Oct ni 24, 2015 (inrinni) khan Pathiana lawmna chhar tharin hlim takin an lo chhuak niin thu kan dawng.
FRONT :
YMA GEN. CONFERENCE VAWI 70-NA A TIAK TA
Pu R. Lalngheta Asst. Secretary ah thlan tlin a ni
YMA Gen. Conference vawi 70-na Oct. ni 20, 2015 a Bairabi a neih \an chu Oct. ni 22, 2015 zan khan a \iak ta a, kan Branch a\angin OB 4, Exe. Comtt. member 8 leh member 22 an kal. Heng zinga 4 te hi hmeichhia an ni.
Oct. ni 20, 2015 zan hi palai lawm zan aniin vantlang in khawmna neih a ni a, Pu J. Lalsailova Trea. in a kaihruai a, Gen. Secy Pu Vanlalruata hnen a\angin annual Report pein Pu Lalrochuanga Pachuau Fin. Secy a\angin Finance Report ngaihthlak a ni bawk. Tin, hemi bakah hian Item hrang hrang thlir a ngaihthlak a ni bawk a ni. Oct. ni 21 zing dar 10:30 khan YMA Exhibition hawnna hun hman a ni bawk. Tin, dar 11:00 am a\angin Rorel Inkhawm neih chhunzawm a ni a, Rorel palai mi 1248 an kal. Pu Labiakzuala Pre. in a kaihruai a, member boral sunna hun hman a ni bawk. Pu Vanlalruata GS in palai chhiarna hun hmangin Pu J .Lalsailova Trea. in 2015- 2016 budget a pharh a, lungrual taka pawm a ni. Rorel inkhawm neih lai hian Hmar veng Hall-ah Variety Programme hman a ni thung. Tin, hemi zan Programme hi zan dar 7 ah Zofate Run ah hman a ni a, Pu Lalrochuanga pachuau Fin. Secy in a kaihruai. Hemi zan hian YMA thuthlung sawirualna hun hman a ni a, Item hrang hrang thlir a ngaihthlak a nih bakah kumpuan bawhzui \ha lawmman sem a ni bawk.
Oct. ni 22, 2015(Ningani) chawhma dar 11:00 ah Zofate Run ah hruaitu thlanna hun hman a ni a, 2015-2017 CYMA hruaitu thlan thar te chu :
President : Pu Lalbiakzuala, Khatla Br.
Vice President : Pu Vanlalruata, Tuikual’S’ Br.
Gen. Secretary : Tv. Lalhmachhuana, Chaltlang ‘N’ Br.
Asst. Secretary : Pu R. Lalngheta, Hlimen Br.
Treasurer : Pu J. Lalsailova, Mission Veng ‘N’ Br.
Fin. Secretary : Pu Lalrochuanga Pachuau, Zarkawt Br.
Hruaitu thlanna neih lai hian Hmar Veng Hall-ah Variety Programme hman a ni. Hemi zan dar 7:00 hian vantlang inkhawm (Palai thlahna) hun ‘Zofate Run’ ah hman a ni a, Tv. Lalhmachhuana Asst. Secretary in a kaihruai. Hruaitu thar inhmelhriattirna hun hman a ni a, khuallian Pu Lalthanhawla Chief Minister bakah Pu Lalbiakzuala President CYMA te hnen a\angin thusawi ngaihthlak a ni a, a thlengtu ‘ Zampuimanga Group’ President Pu H. Vanlalbika hnen a\angin Palai thlahna thusawi ngaihthlak a ni bawk. Tin, hemi zan hian lawmman- hruaitu hlun chawimawina te, ramngaw leh nungcha humhalh \ha, tuihna humhalh \ha, YMA chanchinbu \ha leh CYMA chanchinbu la \ha te hnenah lawmman sem a ni. Item hrang hrang thlir ho a ngaihthlak a ni bawk.
YMA General Conferance hi kumtin ni tawh lovin kumkhat danah hman tawh tur a ni a, 2016 chu rorel inkhawm a hun hman tur niin Central YMA in a thleng dawn a ni.
PAGE - 2
EDITORIAL :
HMASAWN NAN...Ram leh khawtlangin hma asawn leh sawn loh tehna pawimawh tak pakhat chu ‘infiamna-ah hma kan sawn em?’ tih hi a ni a. Keini veng bik hi lo inen ta ila, kan tun dinhmun hian tunhma kan pha ta lo niin a lang. A awmzia chu kan khawtlang hian kawng hrang hrangin hma kan sawn lutuk lo tihna a ni.
Kan \halai tam tak, Football a \ha em em turte, Volleyball etc.. a \ha em em tur leh Athletes ropui tak tak ni tur kha ruihhlo lamah kan tlan nasa a, kan awm vel ta mai mai a ni. Kan \halai tam tak chutiang chu an nih hlawm avangin infiamna chauh nilo; kawng hrang hrangah khawtlangin hma a sawn hlei thei ta \hin lo a ni.
Kan khawtlang hi infiamna lamah mi tlemte; pali/panga vel bawr lek avangin tunah hian Zoram khawvel hriat kan la hlawh ve a ni a. Heng mite inpekna hi a fakawm ngawt mai. Heng miten mual an liam hunah kan khawtlang hi Zoram hriatah kan reh vang vang mai ang tih a hlauhawm khawp mai. Chuvangin, \halai te u, nangmahni leh kan khawtlang tan \ang sauh sauh teh u khai.
Tunah kan khawtlangin thil lawmawm leh hun hlu tak kan tawng ta hlauh mai le. Mizoram a Badminton a intihsiakna ropui bera tel thei veng panga zingah kan tel ve hlauh mai a. Hetiang kan nih theih nachhan bul ber chu kan infiammi tlem te; mi hrat khawkheng te vang a ni.
Keini veng hian infiamna lamah hma kan sawn a, infiammi \ha tak tak kan neih theih nan mitin kan pawimawh vek a. Mihring tupawh fak lawm lo kan awm lova, kan infiammi te hi fak phur a, kan chawimawi thiam chuan an tih theih loh anga lang thlengin kan tihtir thei a ni tih hriain fak phute faka chawimawi phute kan inchawimawi thiam a pawimawh tak zet zet a ni. Kan veng hi a chhe lam aia a \ha lama miin min hriat hi thil nuam tak a ni si a.
YMA GEN.CONFERENCE ROREL TLANGPUI
CYMA Gen. Conference Rorel Palai 1248 ten an pawm (Passed) tlangpui te :-
A. YMA khawih :
1). Social Media hman dan chung changah hnam inpumkhatna tichhe thei thleng palh thei lakah Central YMA in hma la rawh se.
2). Mizo hnam lam leh zai te hi a nihna(originality) hloh thei zawng a cheibawl leh tihdanglam a nih lohna turin CYMA in hma la rawh se.
3). Mizo \awng dik zawk leh uluk zawk a hmang turin inzirtir ni rawh se.
4). Endowment Fund atan YMA member tinin ` 10/- \heuh thawh nise.
b. Sorkar khawih :
1). Skill Development lama hma kan sawn zel theih nan hmalak ni rawh se.
2). Remna ni June ni 30 hi mipui nawlpuiin a huhova lungrual taka hman a nih theih nan sorkar ah thlen nise.
3). Drugs Control Act hi Mizorama hman tur bik khauh zawk a siam a nih theih nan sorkar ah hmalak ni rawh se.
4). Kumpuan thupui atan rawtna lut - ram leh hnam humhalh, mahni intodelh, Corruption Do, Ruihhlo Do te zingah ‘ Ram leh hnam humhalh’ tih chu lungrual takin ban pharin an thlang.
YMA Gen. Conference palai te
Hlimen Branch YMA aiawha palai kal te chu heng mite hi an ni:-
Pu Vanlaltluanga Pre., Pu Lalrinmawia Secretary, Pu lalhmuchhuaka Trea. Tv. R. Lalrindika Pro. Secy, Pu Lalrinchhana (KD), Pu K. Lalremruata(KD), Pu Lalhmunsiama(VP), Pu Laldawngliana (BS), Pu Zoramhmangaiha (BS)Tv. Lalthlengliana (KD), Nl. Melody Zodinpuii (DV), Nl. BJ. Zonunmawii (VP), Nl. Judy Zonunsangi(SC), Nl. Lalthanzami (SC), Tv. Lalpiantluanga (KD), Tv. Rohmingsanga (DV), Pu Lallawmawma(DV), Tv. Joseph Lalrawngbawla (KD), Tv. Lalhruaitluanga(BS), Pu R. Lalzuala (BS), Pu Laltlankima (SC), Tv. Hunlawmawma (BS), Pu Lalremmawia(LSV), Pu Lalhmingmawia (SC), Pu David Rualtinkhuma(SC), Pu Lalengliana(BS), Pu Lalrinsanga(DV), Pu Zarzoliana(BS), Pu Lal\anpuia(SC), Pu Vanlalvena(DV), Pu Ramdinngheta (SC), Tv. Zosangpuia(DV). Pu Lal\hakima(BS), Pu Lalngaihawma (DV).
Conference kal \henkhat te
PAGE - 3
HRIATTIRNA :
UPHC hriattirna1. Inentir tur ten inentirna lehkha hlui leh damdawiin danga inentirna pawh ken tel \hin tur a ni.
2. TB/Khak entir duh tan thlatin thawh\anni chawlhkar 2na leh 4na ah chauh a tih theih.
3. Kum 30 chin chunglam tan san zawng, rih zawng leh RBS (Zunthlum) te lehkha pek rualin tih \hin bawk tur a ni.
Sd/- Dr. Elsa Lalramzauvi,
MO, UPHC Hlimen
Gospel Camping
Hlimen Presbyterian Kohhran Pavalai Pawl te chuan Gospel Camping a buatsaih leh dawn a, Pathian thu a nun tuihal apiangte lut turin turin kan in sawm e. Ken tur te - Bible, pen, Note bu, thleng leh no. Tin, Phone ken luh phal a ni lo. Camp Fee a awm lo. Tlai chaw eikham a luh tur a ni.
A hun : 26-31 Oct. 2015
A hmun : Pu Remthanga In (Quarry veng)
Speaker : Lalrampana(Pantea)
Oct. 26, 2015 (Thawh\anni) tlai dar 2:30-ah Mutbu leh thil \uldang phur tur Venglaiah Pik up a awm dawn a, Camp lut tur te kan in hriattir a ni e.
Sd/- Lalrindika. Organising Secretary
Mb: 8974860413
Local Council hriattirna
Faina hapta puala vantlang hnatlang neih tur kha vengah chhiat tawk kan awm avangin Oct. ni 31, 2015 (Inrinni) ah sawn a ni tih kan in hriattir a, dar 10:00am ah venglai kawnah in nghahkhawm tur a ni ang.hmeichhia in hmunphiah leh buara ken a, mipa in chem, bawngtuthlawh leh suahdur thawhchhuah pui tur a ni. Hnatlang hman lo, pha duh tan ` 100/- a phat theih a, phatna hi Local Council Office-ah Office hunchhungin a pek theih ang. Pha bawk si lo, hnatlang bawk si lo chu ` 200/- a run an ni ang. Tin, run ngai; runna pe duh si lo chuan Local Council recomment na an beisei thei lovang. Tin, veng chhunga sawrkar Office leh School hrang hrang te chu mahni Compound te tifai uar turin kan in ngen bawk e.
Hnatlang neih hma hian kawngpui kama bungraw engchi pawh dah kan awm chuan lo seng hawi lawk turin kan in hriattir bawk e.
Sd/- Lalhmingliana Chairman. LC
LAWRKHAWM :
Lawmthu sawina
Kan unaupa Lalrâwna boral chungchangah lawmthu sawina tur kan ngah hle mai a, a damloh lai a\angin damdawiin leh inlamah te min rawn buaipuiin min \awng\aipui a, a boral hnuah pawh min lainata, damdawiin leh inlamah te kan khawhar hlau a vawiin thleng a min lenpui a min tuarpui avangin lawmthu kan sawi tak zet zet a ni. Mitin hnenah lawmthu kan sawi seng lova, hei hi kan lawmthu sawina ah min lo ngaihsak turin kan ngen a che u.
In khawngaihna dawngtu,
Laldawngliana te unau, Hlimen
Veng chhung Extention chungchang
Local Council ten kan ngenna leh dilna ngai pawimawhin Generation Division P&E Deptt. chuan vengchhung LT line extention atan Electric ban 15 lai mai min pe ta a, tunah hian Quarry vengah dah a ni tawh nghe nghe a, tin, Pu Lawmsanga E.E (Generation Div) P&E in ama hmalakna leh min duhsakna vang liau liau in Mauhakkawn kawng phei (Vengthlang lam) a phun tur ban 5 lai min pe bawk a, heng ban 5 te pawh hi |helretkawnah dah a ni tawh bawk.
Hetiang a veng hmasawnna tur atan thil pawimawh em em mai min tihhlawhtlin sak theih avang hian Generation Division P&E Deptt. chungah lawmthu kan sawi tak meuh meuh a, Tin, Pu Lawmsanga E.E Generation Div. P&E ( 132KV Project) in kan mamawhna hria a, theitawpa hma min laksak avang leh ban 5 lai mai min pek bawk avangin ama mimal lak ah pawh lawmthu kan sawi tak zet a ni.
Sd/- Lalhmingliana, Chairman LC
U.P.H.C. REPORT
Oct. ni 17 - 23, 2015 chhunga Urban Primary Health Centre, Hlimen report :-
1. Inentir zat (OPD) - 182 2. Naupai en zat - 2
3. Kum 6 hnuai lam en zat - 56 4. Nau piang zat - 1 5. Emergency - 3 6. In Patient - 2 7. Dressing - 8
Sumtuak nan flim show dawn
MZP Hlimen Branch te chuan sumtuak nan Oct. ni 27, 2015(Thawhlehni) zan dar 8:00 hian YMA Hall-ah tunlaia Flim chhuak thar leh lar em em, Mizo Flim star lar leh zaithiam ni bawk Alex-a channa ‘ Lungdumtu’ chu an chhuah dawn a, Ticket man hi ` 50, ` 100 leh ` 200 a ni ang. Ticket hi Oct. ni 26, 2015 (Thawh\anni) ah vengchhungah zawrh kual a ni dawn a, Flim show zan hian lei tur a awm bawk ang. He Flim hmuhnawm zet mai hi a bikin \halai te tan hmaih phal chi a ni lo. Tlawmngaia Ticket lo lei sak tur leh Flim show hi en turin MZP hruaitu ten mitin te min ngen a ni.
Hlimen Shuttlers fans club
MBL lo awm tur atan Hlimen Shuttlers Fans Club chuan Fans T-Shirt siam a tum a, a rawng hi home Colour ah a var (white) a ni a, a duh tur chuan TV. Lalmuanpuia hnenah in report tur a ni.
Tin, veng chhunga mi tlawmngai thei awm a ngaihte hnenah a \ul anga vehbur khawn tum a ni bawk. MBL hi Big Screen a en theih tur a ruahman na siam a ni bawk.
PAGE - 4
KEIMAHNI :
Hlimkhawpui BudgetHlimkhawpui 2015 Sept. & Oct. thla Budget pe tla tawh te:
1. Kapdaia Sec. 2. Lalsavunga Sec.
3. Buala Sec. 4. Buala Sec.
5. Damvea Sec.
Tin, Lalsavunga Section te hian Nov. & Dec. thla Budget an tlak fel ta bawk.
Damvea Section
Oct. ni 22, 2015 khan Section sumtuak nan Blanket suk hnatlang neih a ni a, member \hahnem tak an thawk chhuak a, hnatlang a thawkchhuak te chungah hruaitu ten lawmthu an sawi a.
Sikpui Kut kan hman tur atan lengkhawm zai leh hnam lam zir \an chhoh a ni a, tlawmngaihchhuah a member te atam thei ang ber thawkchhuak turin Section hruaitu ten an ngen tak meuh meuh a ni.
Joint O.B. Meeting
Favang rim a lo nam leh \an ta. kumin 2015 Krismas vuak vetah hian hun dang zawng aia danglam bika veng chhung chei tura hmalakna kal zelah Oct. ni 23, 2015 (Zirtawpni) zan khan Branch YMA OB te leh Vengchei OB te YMA Hall-ah Joint Meeting neih a ni a, sumtuak nan sangha te zuarin, One Day Lucky Ticket buatsaih te leh rawra chhut te, chhungtina vehbur khawn a sumtuak hmalakna hi kal pui tur a tih a ni.
Heta tan hian khawtlang mipui te kan \anrual a, theihtawp kan chhuah a \ul dawn a, Committee member te leh Section hruaitu te pawh theihtawp chhuah \heuh turin kan in ngen e.
Sd/- Secretary.
Vengchei Sub- Committee
Branch lawmthu
YMA Gen. Conference Bairabi a neih zawh takah Hlimen Branch YMA hminga mahni sum leh pai, hun leh tha senga palai a kal zawng zawng te chungah lawmthu kan sawi tak zet zet a, tin, kan Branch nominate Pu R. Lalngheta thlan tlin a ni chu lawmawm kan tiin kan lawmpui tak zet a, ram tana a kal zel na turah duhsakna kan hlan tak meuh meuh bawk.
Sd/- Secretary.
Advertisement....
Free admissionRokunga Rimawi Run - Saikhamakawn ah Music rawn zir ve rawh le. Keyboard, Guiter, Drums te hi tlawm takin a zir theih e. Instructor thiam tak tak ten an vil reng e. Admission Fee a awm lo ang. Tin, Mizo \awng thiam lo tan pawh English leh Hindi in class hi pek theih reng a ni bawk e.
(2-1) Contact : 9862706986
9862564975
Lawrkhawm chhunzawmna.....
KAN THEN TAK
Lalrâwna Kum 52
Lalrâwna hi Pu Sailiantawna leh Neihkimi (Bawngruali)-te fa 7 zinga 6-na niin ni May ni 28.1963- khan Hlimen-ah a lo piang a. An unau hi mipa 3 leh hmeichhia 4 an ni. A pa hian Dec. ni 5, 1987-khan chatuan ram a pansan a, Jan. ni 21.2013-ah a nu hian chatuan ram a lo pansan tawh bawk a ni.
June ni 11.1982-ah Health & Family Welfare Department, Govt. of Mizoram-ah a thawk \ana a. Directorate of Health Services-ah awm phawtin, State Referal Hospital, Falkawn-ah a thawk a ni.
Lalrâwna hi mi \awng tam lem lo; mahse, \henrual kawm thiam tak a ni. Chhiatni/\hatniah pawh mi tlawmngai tak a ni. Kohhran lamah chuan Hlimen Presbyterian Kohhran ah a lawi a ni.
An unau mipa zinga naupang ber a ni a, a u Laldawngliana nen Buala Section a an inpui an nghak a. Fapa pakhat – Zonunsanga a nei.
Kum 5 vel liam ta a\ang khan a pum lam hi a sawisel ve \hin a. Damdawi Inah pawh vawihnih a lut tawh nghe nghe. Oct. ni 14 .2015 a\ang khan a pum lam insawiselin Oct. ni 15 .2015 zanah Internal Bleeding (Thi-a luak) a nei a. A chauhpui tak em avangin Oct. ni 16. 2015 (Inrinni) chawhma dar 11:00 khan State Referal Hospital. Falkawn panpui a ni.
Doctor leh Nurse te’n theih tawp chhuahin an enkawl nghal vat vat a. Thisen leh thisen chaw te an pe a. Thisen pawh bur thum lai an pe hman. Amaherawhchu, a natna hian a hneh hle a ni ang. October 16, 2015 dar 1:20 khan chatuan ram a lo pan ta a ni.
KAWNG SIAM
Melthum a\anga High School veng pan chhohna kawng chu tunlai hian PWD lam ten an siam mek a, tin, main road lama a chhe zual lai pawh chei \hat zel an tum a, chutihrualin, Dept. hotute sawi danin sum a awm loh avangin a chhe zual lai tak tak bak an khawih thei dawn lo a ni a,kan veng kawng siam a nih theih nan hian kan Local Council te chuan Dept. lam hi an lo dawr fo tawh \hin a ni.
LAWMTHU SAWINA
Pu Lalnghakliana Saichhuma Sec. a mi chuan Sikpui kut Football khelhna tur Ground a line rin nan chinai thi bag 4 lai mai an hotute hnena min dil hlawhtlin sak avangin a chungah lawmthu kan sawi tak zet zet e.
Sd/- Incharge, Sikpui Kut Football
Hlimkhawpui buatsaihna a kan ei leh in tur lei nan tiin Hlimen Urban Primary Health Centre (UPHC) te chuan pawisa min pe a, kan va lawm em!!!
No comments:
Post a Comment